21 janúar 2008

Próf og einkunnir

Jæja, það eru búin að vera próf hjá nemendum mínum. Ég sé það að ég er að sleppa margfalt auðveldar frá þeim en hinir kennararnir sem kenna sömu bekkjum og ég.

Til dæmis hannaði ég frumlegt útipróf sem vakti mikla athygli hjá skólafólki, börnunum fannst gaman og allir fengu góðar einkunnir. Sem var lítið mál að búa til því prófið var í formi ratleiks og stigagjöfin kom jafnóðum. Þannig að ekki þurfti ég mikið að eyða tíma í að fara yfir.

Annar hluti var hlustunarpróf þar sem ég þurfti ekki að fara yfir nema 20 spurningar. Og svo var þriðji hlutinn ritunarverkefni og ég var að fylgjast með einum samkennara mínum sem tók heilan dag í að fara yfir 10 ritunarverkefni í íslensku. Ég kláraði sömu nemendur í enskunni á skemmri tíma en það tók mig að drekka fyrsta bjórinn á Grand.

Og já, ég fór yfir prófin á Grand. En það er allt í lagi því ég var búinn áður en ég var svo mikið sem hálfnaður með fyrsta bjórinn.

Svo er eitt annað: meðaleinkunnin í ensku virðist vera fjandi há.

Þýðir þetta að ég sé frábær kennari? Eða að ég sé algjör skussi og letingi?

1 ummæli:

Friðþjófur sagði...

Ertu að bíða eftir að nemendurnir lesi þetta og segi þér hvað þeim finnst? Annars finnst mér ekki ýkja snjallt að hafa fundið upp aðferðir til að minnka prófayfirferð án þess að hafa fengið nemendurna sjálfa til að fara yfir prófin. Það hefði sparað þér mesta vinnu!

Skólinn minn virkar t.d. þannig að í þessari viku var media-vika. Sviðshönnuðir, ljósahönnuðir og brúðuleikarar áttu að vinna saman að því að nota miðla (ljós, hljóð, vídjó o.s.frv.) í leikritum og við höfum ekki fengið neitt að vita um það. Kynningar á morgun...