Blíða og brjálæði í bústaðnum

-



Já, við fórum sem sagt með litla svínið í sumarbústað um helgina. Maður rennir soldið blint í sjóinn með það hvernig það fer í pínulítið kríli að skipta svona um umhverfi - ný lykt, nýtt ryk í loftinu, allt eitthvað svo ókunnuglegt. Enda var hún frekar óróleg um kvöldið og lengi að komast í svefn. Það skilaði sér í prýðilegum morgunsvefni og svo var hún bara í góðum gír daginn eftir og sólaði sig í 23° bongóblíðu.
Tveir félagar komu með okkur og leiddist ekki að vera innan um súrefni og fuglasöng, frekar en í fyrri ferðum. Pjakkur er orðinn ótrúlega sjóaður í svona sumarbústaðaferðum enda hefur hann verið að koma með síðastliðin sex eða sjö sumur. Keli ekki eins vanur og ég taldi það á heimleiðinni að hann mjálmaði hvorki meira né minna en 319 sinnum milli Þingvalla og Mosfellsbæjar. Já, mér leiddist á leiðinni heim enda sat ég einn aftur í og hvorki hægt að tala við Rósu (sem var upptekin við að keyra) né tengdapabba (sem heyrir fátt, skilur færra og man ekkert af því sem er sagt við hann) - sá síðarnefndi var alveg að gera mig gráhærðan með bullinu í sér og ekki batnaði það dagana eftir ferðina.

Þannig var nefnilega að tröppurnar upp að bústaðnum reyndust vera orðnar ormamatur - grautfúnar í gegn og tók mig ekki nema um fimm mínútur að rífa draslið þegar við höfðum ákveðið að nú þyrfti að endurnýja tröppurnar. Ég bauð mig fram til verksins og fékk þau svör hjá þeim gamla að ég skyldi algerlega sjá um alla ákvarðanatöku varðandi verkið.

Svo komst ég að því á næstu dögum að sú merking sem hann leggur í þau orð er önnur en íslensk máltilfinning myndi gefa nokkrum heilvita manni tilefni til, því hann hefur hringt fimm sinnum á dag með yfirlýsingar stórorðar, ábendingar misvitrar og stundum hreinasta heilaspuna þegar hann hefur gleymt því hvað okkur fór í milli í síðasta samtali. Það tók til dæmis heilan dag að koma honum í skilning um að Húsasmiðjan ætlaði bara að selja okkur timbrið í tröppurnar, ekki saga það niður í viðeigandi lengdir, hvað þá smíða dótið fyrir okkur. En á myndinni má sjá hvernig mannvirkið mun líta út. Þarna er bara búið að saga timbrið niður í þannig lengdir að það komist í bíl gamla mannsins. Svo á eftir að snyrta það til í hárréttar lengdir og festa saman. Ég set svo mynd hér af dæminu þegar verkinu er lokið. Sem betur fer er til nóg auka timbur í kross á leiði þess gamla, ef ég skyldi nú missa þolinmæðina og kæfa hann með púða.

Ummæli

Skrifa ummæli

Vinsælar færslur af þessu bloggi

Jólabjórrýni Feitabjarnar 2021

-
Mynd
  Djöfullinn danskur! Þá er enn eittt árið að renna sitt skeið á enda og ekki hefur það nú verið neitt frábært, sama hvort þú ert launaþræll hjá ferðaþjónustufyrirtæki, kennari eða hjúkka. Ef þú ert þingmaður hefur árið reyndar örugglega verið fínt því launin eru ágæt og það virðist vera búið að taka þá ákvörðun að leggja niður kosningar svo það verður bara hægt að hirða launin áfram sama hvað kemur upp úr kössunum. Enda veit enginn lengur hvað kemur upp úr kössunum, hvað þá að mönnum sé ekki bara drull. Árið hefur semsagt einkennst af vonbrigðum. Bólusetningarnar sem áttu að redda öllu stóðu ekki undir væntingum. Þríeykið sligaðist undan þyngd fálkaorðunnar og eftirlét samtökum atvinnulífsins að semja sóttvarnarreglur. Bjór hækkaði í verði. Bjór. Hækkaði. Í. Verði. Því ef það er eitthvað sem einkennir jólabjórframboð hinna íslensku brugghúsa, stórra og smárra, á þessu guðsvolaða ári, þá er það helvítis okurverðið. Bjórgerðarmenn hafa tekið til sín slagorð Alþýðusambandsins um að þ...
Lesa meira

Jólabjórrýni Feitabjarnar 2022

-
Mynd
Heimur versnandi fer. Það er ekki laust við að almenningur sé pínu sleginn nú í lok þessa herrans árs tvö þúsund tuttugu og tvö. Við vorum rétt skriðin upp úr umgangspestinni með sínum takmörkunum, valdboðuðu sprautum og innilokunum. Voru fleiri en Feitibjörn sem héldu að nú tæki við betri tíð með blóm í haga? Það var nú meiri djöfuls barnaskapurinn. Hvað fengum við? Jú, eitt viðbjóðslegt stríð til dæmis. Og við klöppum okkur á bakið fyrir það hvað við séum góð að taka á móti fáeinu fólki á flótta úr þessu stríði en á sama tíma erum við enn að senda sakleysingja út í óvissuna ef þau eru öðruvísi en við á litinn og trúa á annan guð. Mjög jólalegt. Nú er meiraðsegja verið að draga fólk upp úr hjólastólum til að henda því úr landi. En við eigum ekki að kvarta, við höfum það jú svo ofboðslega gott á þessu frábæra landi, sjáiði til dæmis bara hvað það gekk vel að selja pabba fjármálaráðherrans banka? Helvítis fokking fokk. En árið er senn á enda og búðirnar fyllast af jólabjórum enn eina f...
Lesa meira

Feitibjörn tekur pásu

-
 Kæru vinir Verkefnið að smakka og dæma hvern einasta íslenska jólabjór hefur vaxið með ári hverju. Feitibjörn hefur verið svo heppinn að geta reitt sig á góðra vina hjálp síðustu misserin og það hefur verið bæði gaman og gefandi. Þakklæti til frú Feitabjarnar, Koppa-Krissa og svo er það hann elsku Immagaddus. Þessi nöfn segja ykkur auðvitað ekki neitt, sem er alveg eins og það á að vera. En Immagaddus féll frá á sviplegan hátt fyrir nokkrum vikum. Hans er sárt saknað og einhvern veginn finnur Feitibjörn ekki hjá sér löngun til að fara í hina árlegu risasmökkun akkúrat núna.  Vona að þið skiljið þetta og hittumst vonandi hress að ári.
Lesa meira