Ekki er öllum gefið að.... reka fyrirtæki

Konan mín, til dæmis. Hún var verktaki hjá frænku sinni á snyrtistofu. Frænkan arðrændi hana í þrjú ár með því að hirða helming af allri innkomu sem Rósa skaffaði, en lét hana borga allan vaskinn. Sem þýddi að Rósa fékk 30 krónur af hverjum hundraðkalli sem hún vann sér inn. Svo var henni reiknaður tekjuskattur af heildinni þannig að eftir þrjú ár sat hún uppi með skuld við Tollstjóra upp á hálfa milljón.

Og áttum okkur á einu: eigandi snyrtistofunnar lagði hart að Rósu að gera við mig kaupmála áður en hún giftist mér, svo ég gæti ekki hirt af henni peninga.

Veltu því aðeins fyrir þér.

En svo kemur að því að skattmann fer að rukka og Rósa gerir við hann samning. Samkvæmt honum á bakaríið sem Rósa var þá að vinna í að draga af henni extra tíuþúsundkall á mánuði sem á að ganga upp í skuldina.

Hún er alveg einstaklega heppin með vinnuveitendur þessi kona.

Eftir tíu mánuði kemur í ljós að bakaríið hefur fimm sinnum dregið af Rósu án þess að borga skattinum. Hin fimm skiptin var ekkert verið að draga af henni neitt. Sniðugra þannig, þá virkar hún samsek þegar lögfræðingarnir vakna.

Talandi um að vera tekin í bakaríið.

Svo þegar fjárnámstilkynningin berst þá rjúkum við upp til handa og fóta og reynum að afstýra því að íbúðin okkar fari á uppboð.

Það þýðir meðal annars að við segjum bæði Tollstjóraembættinu og VR að Brauðberg sé að stunda þjófnað frá starfsfólki sínu.

Ég veit, við vorum miður okkar.

Það var flóðhestastubbur bakari líka (hann er feitur) og lét það eftir sér að senda konunni minni ógnandi SMS þar sem hann þakkaði henni á kaldhæðnislega hátt fyrir traustið.

Það var einmitt af því að hún asnaðist til að treysta honum í tæpt ár að þetta vesen kom upp. Hefði hún ekki treyst honum hefði hann ekki komist upp með að stela af henni í tæpt ár.

Brauðberg ehf. er með tvö útibú. Í Hraunbergi 4 í Breiðholti og á Hagamel 67 í Vesturbænum.

Ykkur er öllum boðið upp á ókeypis með kaffinu næsta mánuðinn. Segið þeim bara að draga það af því sem þeir stálu af Rósu.